BMT TŞ İranın nüvə proqramı ilə bağlı fövqəladə məsləhətləşmələr keçirib

Bakı - APA. BMT Təhlükəsizlik Şurasının keçirdiyi fövqəladə məsləhətləşmələrdə İrandan uranın zənginləşdirilməsini dayandırmağı və “altılıq” olan vasitəçi dövlətlərlə danışıqların davam etdirilməsinə çağırış səslənilib. APA-nın İTAR-TASS agentliyinə istinadən verdiyi xəbərə görə, məsləhətləşmələr

Fransanın təşəbbüsü ilə keçirilib və bağlı qapılar arxasında aparılıb. Görüşdən sonra Fransanın BMT-dəki nümayəndəsinin müavini Martin Brins deyib ki, İranın uranı 20%-ə qədər zənginləşdirməsi Atom Enerjisi üzrə Beynəlxalq Agentliyin 2011 ilin noyabrında qəbul etdiyi qətnaməyə və BMT TŞ-nin 6 qətnaməsinə ziddir. O bildirib ki, Fransa İranın nüvə proqramı ilə bağlı “təzyiq və dialoq” siyasəti yürüdür. M. Brinsin sözlərinə görə, Fransa Tehrandan danışıqların davam etdirilməsinə dair təklifə cavab gözləyir. Eyni zamanda İrana qarşı yeni sanksiyaların tətbiq edilməsi nəzərdən keçirilir. Fransa diplomatının mövqeyini ABŞ, Böyük Britaniya və Almaniyadan olan həmkarları da dəstəkləyiblər. Xatırladaq ki, Atom Enerjisi üzrə Beynəlxalq Agentliyi İranın Fordu dağının içində tikdiyi yeraltı nüvə obyektində uranın zənginləşdirməsinə başladığını bildirib. Bununla bağlı BMT, ABŞ, Fransa, Böyük Britaniya, Almaniya, İtaliya və Rusiya öz narahatlığını bildirib.